برد بمعنى الكلمة
يازين الدفا .. وياشين البرد .. هالمقولة اعيدها اكثر من 3000 مرة في الاسبوع .. كل ماطلعت برى الشقة وشفت منظر الثلج. الترموستات اللي في الجهاز الحسي عندي ماخذه اجازه من فتره طويلة .. بمجرد الخروج خارج ارض الشقة يُفقد الاحساس تماما .. الى درجة اني احس اني طالع بدون خشم بس استوعب اني اتنفس بعد فترة بسيطة وادرك انه مازال عندي خشم ومابعد فقدته لاني احس انه من شدة البرد انكسر وتفتت.
عرفت البرد الصدقي يوم شفت درجة الحرارة تلامس 32 – تحت الصفر .. قلت في نفسي ياصبر سكان الاسكيمو .. وعرفت ان مايصبر على هالاماكن الا ذوو الجلود الحرشفية واللي منزوع منها كود الحس واكتشفت ان اسلاك الاحساس في المخ مفصولة عن الجهاز العصبي والتنفسي والا من يعيش بالله في هالوضع المزري ؟
قال وش حادك على المر .. قال اللي امر منه ..
ومن يبي الدح مايقول اح ..
الصبر مفتاح 14 ..
ياحزم الضامي ..
ياصبر ايوب ..
صبر جميل والله المستعان..
كل هالامثال والحكم جربتها .. وفي النهاية النتيجة السنون تصافق .. واليدين تنافض .. والاذان تزن .. سيناريو يتكرر كل يوم .. صبح مساء .. دقيقه بدقيقه.
كان للدنيا الوان في عيوني .. اخضر احمر بني اسود ازرق سماوي رمادي .. بس الان كل شي في عيوني صار ابيض في ابيض
لون الشوارع ابيض .. لون السيارات ابيض .. لون البيوت ابيض .. لون الشجر ابيض .. لوني انا حتى صار ابيض ..
والنهاية ؟ ما اقول الا الله يعجل بالصيف مع انه كله على بعضه 3 شهور .. بس على الاقل الواحد يقدر يلبس نص كم.
| إقرا أيضاً المواضيع التالية: |
صح عليك يا البرد
مير حنا ماجانا مطر
مغضوب علينا
الله يوفقك مير لا اوصيك بتسخين الموتر قبل لا تحرك
حتى انا اكره الشتاءءء
الله يعين جاء
بالعكس أحلى شي البرد والشتا
الي يسمعكم يقول انكم تحبون الصيف