السخونة والبرودة بالألوان
سلم لي على الناس اللي تخترع .. مهوب تبطح وتسدح وروحات وجيات .. ناس فعلا مخها نظيف وجالسة تبتكر اشياء كل يوم .. وحنا اللي علينا نشتريها منهم ويطلعون من ظهورنا ارباحهم .. والله حرام يسمونا دول العالم الثالث .. المفروض نكون دول العالم المتخلف اللي ماقد اخترعنا ولا ذبابة..
عموما .. نرجع للاختراع .. هذا الاختراع يبين لنا درجة حرارة الموية من حيث البرودة والسخونة بالالوان .. يعني مايحتاج تسوي ذكي وتلمس الموية وهي حاره وتحرق يديك .. ان شفت لونه احمر يعني حار .. وان شفت لونه ازرق فتراه بارد .. واذا تبيه وسط .. راح يندمج اللون الاحمر والازرق .. وعيش حياتك ..
مبروك للهلال (الزعيم)
كعادته الهلال يحصد بطولة كاس ولي العهد بعد فوزه على الاتفاق 2-0 بعد تسجيل ياسر القحطاني و طارق التايب. الحارس الدعيع بغى يخربها الا شوي ويعتزل بس غير رايه على اخر لحظة .. برضوه الشلهوب يقول ابرتاح الى نهاية الموسم الظاهر انه تعب من لعب السوني عيال حارتهم والبطولة وقت مناسب انه يريح. الظاهر الشباب ماخذينها موضة. على العموم الف مبروك لهلال الفوز وعقبال البواقي من البطولات.
كبسة دجاج في الصميم
كبسة دجاج بالصور
بعد دروس الكبسات وخصوصا كبسة الربيان, للاسف فيه ربات بيوت جديدات على مهنة الزواج مايعرفون يسون كبسة دجاج .. ومن واقع خبره اغلبهم يعرفون يسوون حلا .. يعني اصابع تويكس يرشون عليها سمسم ويقولون نعرف نسوي حلا.
عموما ابعرض لكم يا العزابية ويا ربات البيوت اللي ماتعرفون تطبخون كبسة دجاج وشلون تطبخون الكبسة
اولا مقادير كبسة الدجاج هي كالتالي:
زيت – دجاج – رز – طماط – بصل – فلفل حار – مسمار (قرنفل) – هيل – ملح – ثوم
برد بمعنى الكلمة
يازين الدفا .. وياشين البرد .. هالمقولة اعيدها اكثر من 3000 مرة في الاسبوع .. كل ماطلعت برى الشقة وشفت منظر الثلج. الترموستات اللي في الجهاز الحسي عندي ماخذه اجازه من فتره طويلة .. بمجرد الخروج خارج ارض الشقة يُفقد الاحساس تماما .. الى درجة اني احس اني طالع بدون خشم بس استوعب اني اتنفس بعد فترة بسيطة وادرك انه مازال عندي خشم ومابعد فقدته لاني احس انه من شدة البرد انكسر وتفتت.
عرفت البرد الصدقي يوم شفت درجة الحرارة تلامس 32 – تحت الصفر .. قلت في نفسي ياصبر سكان الاسكيمو .. وعرفت ان مايصبر على هالاماكن الا ذوو الجلود الحرشفية واللي منزوع منها كود الحس واكتشفت ان اسلاك الاحساس في المخ مفصولة عن الجهاز العصبي والتنفسي والا من يعيش بالله في هالوضع المزري ؟
أمريكا: فلوريدا .. تستحق الزيارة
بعد عنا وتعب ومشقة .. قررت اخذ لي اجازة ارتاح من صجة البحوث وصجة المشاريع والاختبارات اللي كانت متتالية على مدى شهرين اللي ضاغطتني وطلعت عيوني .. كان عندنا اجازة الربيع ومدتها اسبوع يعني 10 ايام مع ايام الويك اند وكانت صراحة فرصة ان الواحد يشم شوية هواء بعيد عن شكل الاوراق والدفاتر والاقلام وريحة الحبر وطريق الجامعه اللي يحسس الواحد بالغثيان.
قررت اني اطلع لولاية فلوريدا .. وكانت بالسيارة والمسافة طويلة جدا يعني مايقارب 5120 كليومتر ذهابا ايابا. كانت الانطلاقة تمر على 6 ولايات ابتداء من ولاية مشقن مرورا بولاية انديانا ومن ثم كنتاكي ومن ثم تينيسي ومن ثم جورجيا واخير فلوريدا وفي الخريطة التالية يبان خط الرحلة واللي كانت من الشمال الشرقي الى اقصى نقطة في الجنوب…
